फुलंब्री तालुक्यातील आदर्शगाव किनगाव ही अनुराधाताईंच्या कार्याची गंगोत्री. आपल्या गावाला आदर्श गाव बनविण्याची प्रेरणा पती श्री.अतुल चव्हाण यांच्याकडून घेत अनुराधाताईंनी अत्यंत जिद्दीने व कल्पकपणे कार्याला प्रारंभ केला. एका ध्येयाने कार्य करताना संपूर्ण गावाची ऊर्जा एका निश्चित दिशेने कार्यरत होण्याची आवश्यकता असते. किनगावच्या नागरिकांच्या ऊर्जेला दिशा देण्याचे कार्य अनुराधाताईंनी यशस्वीपणे पार पाडले. अनुराधाताईंनी धामणेर, हिवरेबाजार, राळेगणसिद्धी, पाटोदा आदी ठिकाणची ग्राम विकासाची कामे अनुभवली. ’पद्मश्री’ श्री.पोपटराव पवार, डॉ.अविनाश पोळ यांचे मार्गदर्शन त्यांना मिळाले आणि त्यातून किनगाव परिसरात आदर्शगावाची चळवळ रुजू लागली. ग्रामविकासाचे एक आदर्श उदाहरण यानिमित्ताने उभे राहिले.